Waa gabayga hoos ku qoran oon odhan karno waa gabayga ugu muhiimsan gabayyada somaliland.
Wax kasta gabayaaga somaliland  way ka gabyeen,adduunayada waxa looga yaqaana inay yihiin
gabayaa aan lala tartami karin. Ilaaahay naxariisti janno ha ka waraabiyee, Maalintii
Somaliland Gobanimada ay qaadatay 26kii juun 1960 ayuu gabaygan qiimaha leh ka tiriyay
meeshii laysugu yimid ee lagu dajinayay Calinkii Ingriiska. Gagadaasoo dad aad u badan ay
isugu yimaadeen. Gabayaaga maalintaa goob jooga ahaa wax ka mid ahaa Qaasim iyo Cabdi
Idaan oo iyaguna ka tiriyay  tixo gabayaal ah oo kala gadisan.
   Cabdilaaahi Suldaan "timacade", isagoo ka hadlaya qiimaha xorriyadda iyo calanku leeyahay,
dhibaatooyinkii loo soo maray iyo meesha uu kaga yaallo umadda somaliland.Waxa gabaygaa
tiradiisu ahayd 126 bayd.


Anigoo sebi uun ahoo         Sita leeb iyo qaansoo
Siigaduun isku aasoo         Sabo reer ka fogaanoon
Laygu aaminin soofkiyo       Saaca maanta aan joogno
Gabaygu waygu sugnaayee      Haddii aan Sarsarriigo
Ama aan surmaseejo           Amaba aan sixi waayo
Ama aan ka salguuro          Amaba laygu saluugo
Soomaalida i maqlaysaay      I su'aala hadhow



Ilaahaan waxba seegine       Subaciisa Quraankiyo
Sabbaxooyin ku sheegayow     Saciira iyo naciima
Rabbiigii kala seerayow`     Markay suurtu dhawaaqdo e
La soo saaro makhluuqa e     Shaqiga iyo saciidka
Maalintaad kala soocdo       Dembigaannu samaynay
          Rabbigayow naga saamax



Subciyay oo ka dukeeyaye     Ka siddeetan sebaaney
Calankaannu sugaynaye        Sahankiisa ahaynow
Seermaweydo hillaacdayow     Sagal maanta darroorayoo
Siigadii naga maydhayow      Saq dhexaannu ahayne
Kii soo saaray cadceeddow    Samada kii u ekaaye
xiddigaa mid la siiyayow     Saaxirkii kala guurrayeaha
Sarreeyow ma-nusqaamow       An siduu yahay eegno e
         Kaana siib Kanna saar



Saahidiinta lslaamka e       Subcisaa Jimcayaashiyo
Sibyaanta iyo haweenku       Calankay Saadinayeenow
Cidina kaanay na Siine       Saatir noogu yaboohayow
Saaxirkii kala guurraye      Sarreeyow ma-nusqaamow
Aan siduu yahay eegno e      Kaana siib kanna saar



Sallaankii istiqaalkow       Sedadu kay ku xidhnaydow
Sayruukhii Afrikaadow        Saaxirkii kala guurraye
Sarreeyow ma-nusqaamow       An siduu yahay eegno e
Kaana siib kanna saar



San-ku-neefle dhammaantii     Khalqiga kii u sinnaayeen
Mid saaxiib la ahayne         Sangalkii iska diidayow
Saaxirkii kala guurraye       Sarreeyow ma-nusqaamow
Aan siduu yahay eegno e       Kaana siib kanna saar



Soomaloo iscunaysa oo         Saqda qaylo dhawaaqdiyo
Sulub laysu cabbaystiyo       Hadba soof la xabbaadhiyo
Saraayaa dami weyde           Kii laydhiisu na saaqdayow
Kii sadqeeyey qabaa'ile       Isu saaray gacmaa ee
Saf walaala ka yeelayow       Saaxirkii kala guurraye
Sarreeyow ma-nusqaamow        An siduu yahay eegno e
          Kaana siib kanna saar



In sidayda tihiin iyo        In kalaanan saxaynine
Soomaloo calan taagta        Saakay noogu horraysa oo
Saddex wiig iyo maalmo       Haddaan Soor cuni waayo
Safrad laygama yaaboo        Sarina mayso naftayda e
Saaxirkii kala guurraye      Sarreeyow ma-nusqaamow
An siduu yahay eegno e       Kaana siib kanna saar



Nimankii na Siraayaye        Waaxwaax noo kala saaftaye
Solanaayey cadkeenna e       Innagoo dhexda suunku
Sabarkeenna qarqooray        Kii sedkeenna Cunaayaye
Sarartiisa ka muuqdaye       Surwaalkii ka yaraadaye
Daaro loo sibidheeyiyo       Sariiraa lagu seexdiyo
Kabadh suuf laga buuxshiyo   Mid baabuurka safeeyiyo
Aayad saarta carruuurtiyo    Sagaal boy iyo kuug iyo
Weliba seeksa lahaa          Kii saabaanka u laabayow
Saaxirkii kala gaurraye      Sarreeyow ma-nusqaamow
An siduu yahay eegno e       Kaana siib kanna saar



Sawjarkaa hubka qaataye      Intuu soodhka ku taagey
U diyaara salaantiyo         Saraakiisha amraysaay
Sifihii isticmaarka          Ka siyaadiya maanta oo
Sibilkiinnan ag joogow       Sibirtiisa istaaga oo
Nin walbaan sigib beeloo     Sarow taaga gacmaa oo
Sacabkaysku garaaca oo       Nin walbow saddex goor
       Subxaanow waa mahaddaa dheh

Subxaanow waa mahadaa
Subxaanow waa mahadaa
Subxaanow waa mahadaa!

Gabaygan waxaa tiriyey abwaankii waynaa ee Cabdillaahi Suldaan Timacade.
Abwaanku wuxuu gabaygan si murugo leh kaga hadlay dhibaatooyinka qabyaaladdu
leedahay iyo sida ay umadda Soomaaliyeed ula hadhay una baabiisay hadii aanay
ka hadhina aanay aayo lahayn. Soomaaliyi inay ka hadhaan daaye waa bay sii
badsadeen sida bariiska, sidii abwaanku sheegaybaana dhacday baaba' iyo hoog!

Wuxuu yidhi:

Dabuubtiisa gabay waan ka tagay     dihashadiisiiye
Dubaaqayga waataan ka jaray         waa fog dabadeede
Shin kastood daleed uga baxdoo      nabar is-diidsiiso
Dibnahaagu shaygay bartaa           waad ku dayataaye

Haddii gole dabbaaldeg iyo farax    loo dalbado maalin
Oo loo duddeeyoo khalqigu           daawasho u joogo
Uu mid aan daryeelini xakame        daamanka u geliyo
Uu duulin orodkuu lahaa             dalacsi siin waayo
Uu cidhibta darrandoorriyuu         duubo madaxiisa
Debcin maayo oo wuxuu ka baqan      inuu ka duulaaye

Haddaad adigu daacuun ku tahay      dooddan iyo baacin
Gacmaha waa ka daayaa ninkii        fuulmo daashade
Jeeroon direyska u gashoon          dibeda soo taago
Daleen aniga iigama tagee           waa dig siin jiraye

Waxaan gabayga deelka iyo laftiyo   diirka uga qaaday
Dadka waxaan ogaysiinayaa           dowgu suu yahaye
Soomaaliday dayaya wanaag           idinka doorsoonye

Docda bari, dorooriga baddiyo       Seylac deriskeeda
Dusha koonfureed iyo ilaa           wabiga daaciisa
Degmadeena oo iil haddaan           dayey abwaankeeda
Nimaan duubiyadu naafo noqon        deelka laga waaye

Dul iyo hoosba waan ugu dhigay      waa dixdhagaxeede
Anuunbaa damqanayee dhaguhu         uma daloolaane
Dadkaan la hadlayaa baan lahayn         dux iyo iimaane
Bal inay dalfoof tahay caqliga      dooni laga saaray
Wixii hore usoo daashaday bay       degashanaysaaye

Doc hadday u wada jeedsatooy        dhowrto danaheeda
Ooy duul walaala  ah tahay ooy      duunka ka heshiiso
Dadka kama yaraateene ways          dabar jaraysaaye
Dubba madaxa wayskala dhacdaa       daa'in abidkiise
Goortay is wada dooxatay baa        daad u soo geliye


Ubadkiinii waad daadiseen           waana dubateene
Dubaaxdiisii waad wada cunteen      duhur dharaareede
Dariiq toosan Soomaaliyey           waa lagaa deyeye
Darajada Ilaahay ninkii             doonayaa hela e
Nin ka duday distoorkioy waxyiga    diinti ka carrowye
Dugsi malaha qabyaaladi waxay       dumiso mooyaane

Hadaynaan xumaanta iyo dilkiyo      daynin kala qaadka
Dibaddaan ka joognaa sharciga       daacadda Ilaahe
Danbarkeedu waa Jahannama           iyo dogobkii naareede
Dugsi ma leh qabyaaladi             waxay dumiso mooyaane

Dir dir la isu laayiyo intaan       weerar daba joogno
Ooy dumarku weerkii sitaan          danabadii waayey
Uu sida dureemada u yaal            meydku dibaddiinna
Wallee doogsan maysaan haddaad      dunida joogtaane
Dugsi male qabyaaladi               waxay dumiso mooyaane

 

Cabdullahi Suldaan Timacadde gabaygan wuxuu tiriyey lixdamaadkii markaasoo dawladii
markaa maamulka haysay aad iyo looogu dhaliilayey musuq-maasuq iyo fusuq ka dhex socday iyo inay
dayacday mabda'ii dawladnimo xilkeediina aanay kasoo bixin. Markaa isagoo qararanimadii iyo xornimaddii
ku metalaya hal la yidhaahdo maandeeq oon xero xun gelin oo inta cadow dhacay laga daba tegay oo si
xarago leh loosoo dhiciyey ayuu gabaygan tiriyey.

Wuxuu yidhi:

Gumaysigu hashuu naga dhacay           een gurayey raadkeeda
gu'yaal iyo gu'yaal badan              hashii gama'a noo diidey
goobtay istaagtaba hashaan             joogay garabkeeda
guuraa habeenimo hashaan               gebi walba u jiidhay
gaashaandhigeedii hashu                galowgu eedaamay

hashii geeddankeedii rag badan         goodku ku casheeyey
gacmaa lagu muquunshaye xornimo        noogumay garane
garre iyo guntane maalintay            gees isugu boodey
Allaa noo gargaaree xornimo            noogumay garane
geeraarradeedii hashaan                annigu googooyey

galool iyo maraa iyo hashaan           kidiga geylaanshey
gaajiyo harraad badan hashaan          ugu garaacaayay
goobtuu sidkeedii go'ay                galabtii foolqaaday
ayadoo candhada giijisay               oo godol ku sii deysay
Garaad midan lahayn bay                la tahay waad ka gaagixine
annagoo gantaalaha dhaciyo             haysan qori gaaban
hashaan gaadda weynow libaax           uga gaboon waayey
Inaan Garayacawl uga tagaa             waa hal soo gudhaye.

Casiisaw waa mahadaa

Timacade wuxu geeraarkan inagu tusaaleynayaa awooda Eebbe ee aan koobnayn. Geeraarkan waxa inooga muuqaneysa aqoonta qotada dheer ee Timacadde u lahaa diinta. Wuxuu ina tusaaleynayaa jirrabkii iyo dhibaatooyinkii la soo mariyey Nebiyada iyo siduu Eebbe ugu hiilliyey, wuxu yidhi :

Ilaahi cirka taagayee
Dayaxa iyo cadceeddiyop
Xiddigaa ku cigaalayow !
Ilaahi caadil ahaaye
Dhulka caynkan u daadshaye
Ku culaysiyey buurta e
Isagoon cidi joogin
Casiiskii Nebi Aadan
Ka buuray cammuudda e
Cidhifkaa bidixdiisa
Intuu caaro ka jeebay
Cadkii Xaawa ka yeelayow
Ilaahi caadil ahaaye
Ciyaarsiiyay buxuurta e
Ceejiyee ama siiyayow
Ilaahii caadil ahaaye
Casiiskii Nebi Luud
Kuwii caasi gareeyay
Amaba ceebta yiqiinnay
Habeen cawda u gooyayow
Ilaahii caadil ahaaye
Casiiskiisii Suleymaan
Dabayshuu carbiyayow !
Ilaahii Nebi Ciise
Cilmigiisa ku qaadaye
Cashaduu iman doonana
Cawar seef ugu dhiibayow
Ilaahi caadil ahaaye
Casiiskii Ayuub
Cudurkii uu ku raajay
Marki uu caban waayey
Caafimaad ugu doorshay
Curuuqddiisii dhammaatiyo
Raxmaddii ku dul caastay
Cimrigoodi yareeyaye
Cusbeysiiyey Jidhkooda E
Caruusiinta ka yeelayow

Reer Saxardiid   Dib U laabo

Reer Saxardiid

Geeraarkan Cabdullahi Suldaan (Timacade) Eebe naxariista Janno ha ka waraabiyee wuxuu kaga hadlayaa dhibaatooyinka iyo aaya xumada qabyaaladda. Wuxuuuna caddaynayaa haddii aan laga hadhina inaan wax hagaagayaa jirin qaranimo iyo dwlad la haysanayaana ayna jirin. Wuxuu yidhi:

Intaad Reer Saxardiidiyo
Reer Sarreeye Dubeeyiyo
Reer Samaale tihiin ee
Suldaan Caarshe ogaa iyo
Cuqaashii San Qalloociyo

Subax kiina casheeyaa
idin seexinayaan
Sallaan aad ka baxdaaniyo
Salka meel aad dhigtaan
sacabkoo tima yeeshiyo
saabuun xoor laga waayiyo
waa dameer san madowoo
sina loo arki maayoo
waanay suurta gelayn

              Hooyaale   Dib U laabo Gabayada Cabdilaahi Suldaan timacadde IIlaahay naxariistii janno ha ka waraabiyo eh gabay ka mid aha.


Indhawaydba hooyale gabay hiigso ma lahayne
waa taan ka saahiday tixii hibadu saarayde
meeshiyo hilaaci kal hore maan haloosiine

dharaartaan haleelaan wixii hore ilaabaaye
hijradiisa goortaan dhex galo ha iyo wowgiisa
markaan anigu hoonka u tumo ayay haadka bixiyaane

hagaag uma talaabsado ninkaan hamaga saaraaye
waxaan gabaygan haatanna ku nacay hadimo waa heele
hadalada dul ow hoosta ay haaf ka dhigayaane

afartaa hilaac iyo tus iyo heego maw yeelay
hannaan gabayga waw marin jiree hadaladaydii dheh
hirara kalena waa maansaday hibatay laabtaydu

hal wanaagsan oo kuu dhashiyo hoos mid laga waayay
hadhuub inaanay wada buuxinayn hubati sow maaha
sange lagu horseediyo magaan hararaflaynaya

inaanay habaas wada galayn hubati saw maaha
hamadeenu bari bay ahayd heesta naagaha'e
heeladiyo barjuhu waa wixii hoos inoo dhigaye

hareeraha raga inaga xigaa helay libtoodiiye
heeryada gumaysiga ma rido ka u habranayaaye
lama helo wadaadow waxan ciddi u hawshoone

nafta loo hantaaqa waxay higso leedahaye
haween iyo rag waa loo guntaday hawshi barigiiye
gobanimdan hoobaan dhacday ee lagu haraad beelay

haydh-haydh haday naga ahayd haw ku soo nidhiye
haaneednay maandeeq Ilaah nama hungaysiine
diyaaraadka heegada mara ee haada la ciyaara

amikaarka hawsha u sita ee huriya duulaanka
dabaabadaha lagu hawdiyo maynka lagu haagmay
hubka iswada haydrogiinta iyo saanadaha haadha

hustankiyo afdheerha socdiyo haafafkiyo jiibka
raga taarka soo halabsady ee hadiyad noo siiyay
nin walba wuxuu noo huray buu hooya leeyahaye

habeen dhow wacane inaynu noqon waana la hubaaye
wax banabaa hadda reer la miray hoystay xoolaha'e
wax badanbaa hilaac lagu habqamay haadku gaylamaye

wax badanbaa hayaaya iyo wareer laysla hoosgalaye
labba hooyo wada foolatay oo hudantay waa ceebe
halka nabada lama dhaawacee hadimadii daaye

nin walbow wixii kugu habboon hoos u dhugo caawa

Ragee   Dib U laabo Markii malag Jibriil uu waxyiga Maxamad siinaayay
nimankii maroodiga koree magane kooraystay
Makka kuwii inay ku duulaan uunka maqashiiyay

meeshiyo Abraha waxay ahayd dawlad maatiyahe
maskaxdii gabowdiyo waqtigu waaba kala maane
haddii dhiig nin uun laga mutaa rag u macaanaado

malabsiga ayaamaad hadduu mahad ku noolaado
magool suna mar waa cunni jiriyo midho dhunkaaleede
wuxuu Xayle meehaday iyo malihii beenowye

meeshiyo Berbera wuxuu lahaa maalin baad qabane
Geel-jiraha maarraha sitaa madhiyay geeshkiiye
ma moodayn Amxaarada inuu mawdku soo wado'e

nagamuu macaashine markay miririgtii yeedhay
milatariga dhaarsani markuu moote ku asqeeyay
madaafiicda waaweyn markii midigta loo dhiibay

Mingistiyo colkiisii la waa meel uu joogaba'e
muruguu dibnaha ruugayoo uu madowyahaye
maantaan gadhkii midhiqsanaa mid uga taagnayne

minka baxaya faalkaan arkiyo feleggii kaa meerye
Yuhuu magansataa iyo Qarbigu kuu mashxaradyaaba
isku muuqan maynnee markay miiranto aan eegno
Reer Saxardiid   Dib U laabo

Reer Saxardiid

Reer Saxardiid   Dib U laabo Gabaygan Timacdde waxa uu tiriyay mar 1961 kii uu socdaal ku tagay magaallo madaxdii baabaday ee la odhan jiray Xamar. Dawladdii ay Somaliland sida fufud ugu deeqday taliskii Haystay Xamar ayuu ka war doonay. Waxa argagixso ku noqotay markii uu arakay in Qabiil iyo kala qaybin lagu xukumayo dadka ee aan dawladnimoba jirin ayuu ticxdan tiryay abwaanku.

Wuxuu yidhi Timacadde ilaahay ha u naxariisto'e:

dawarsadaha qaawani kuwuu daasadda u madhiyay
ee daaskeenii wixii yaalay lagu doortay
dikhsi lama xisaabsanid haddaad dow ku kulantaane

dmabarkeedi Maandeeq nimaan doonin ba dhamaye
shicibkii dagaalka u galaa daadsan suuqyada'e
dadkan wada dallacay dawladahan dahabka shiilaaya

da'deenay ahaayeen kuwaa loo dabaaldagaye
doqoniimo Somali waa loogu dawgalaye
gortaan horoo loo durkiyo darajo eegaayay

hadduun baa sidii buul-duqeed daaha loo rogaye
daayeerna laas waa qotaa doox hadduu tago'e
daa'imo carruureedna ways daba gurguurtaane

hadduun bay u dooyasantahay shayadii dilaye
imikaa la doondoonayaa dir iyo daaroode
dibse way u aar gudan hadday diido reer hebele

mar haddaan Talyaanigan dhex degay cidi ka duunbaynin
iga daaya gabaygaygu waa iiga darayaaye!!!!!!
Reer Saxardiid   Dib U laabo Abwaanku wxuu halakan ku muujinayaa dhibaatooyinkii dalalka hore u maray ay ka soo gudbeen, iyaga oo isakaashanaya oo wada jir wax ku wada qabsanayaa. Waxa kale ee uu dadka xusuusinayaa in dawladaha hore u maray iyaguba soo mareen balanbal iyo jab iyo hoog.

indhawaydba qarankiisa gabay qaad isma lahayne
wax waliba qisuu leeyahayiyo qir iyo maamuuse
qawaanniinta maansaduna waa qalad la'aan sheege

halkaan xarafku kuu qabanba waa laga qandoodshaaye
maansada qaraamiga yaryar ee qayliyaa dilaye
qarka Orobba qaaliga frans qooriyada maarsi

quruxdii Almaaniya dhulkii Muuse laga qaaday
qalcadihii burburay reerahay qadaydu yeedhaysay
ninna lama qasbine waa u kaseen inay qasaaraane

wuxuu qalinku meeraba markii laysu wada qaatay
qabbaa rag isu geeyaye markay qaraxday baaruudu
tangiga qafilan maalintuu qaatay minawaarka

qaladdii Jabbaan lagu dhuftuu qoob la rogi waayay
qumblooyinkii oo kalaan maanta qubayaaye
haddaad qaban karaysaan araar qaaliyaan tirine

dawladahani laga qayliyee qaaq wax kaga siiyay
nin waliba marbuu qaadan jiray qanso iyo leebe
qorfo iyo marbuu seexan jiray qalanqal hoosteede

hayeeshee quluub wada jirtaa qaniya sheekhoowe
qalalaase meel lagu lumiyo qaylo iyo oohin
qorraxdii dhacdaba teenu way kala qaxaysaaye

qod la riday qudhaanjada gashaa qoob dad wow halise
hadduu geed qalaalo roobku waa u qamac kaliileede
dirxiga qudhunku uma soo uree waabu quudsadaye

qabaa'iil iyo jeero la naco qaadkan lagu waashay!
qasti jeeroy wada yeelatoo qawlka ku heshiiso
qabyo weeye Somalidaay qiiradaadaniye

nin qalbi la' quraan ka u akhriyay qaaf dhe ku haraadye
kutubtaa sidii lagu qarridhay qiil la' aakhiro'e
qayrkii ka hadhe waa ninkii qalay walaalkiiye
Murugo   Dib U laabo Gabaygan waxa tiriyay Cabdilaahi Suladaan Timacadde Ilaahay naxariiste Janno ha ka warabsho eh. Timacadde lama uu mid ahayn gabayaaga Somaliland dhammantood. Waxa ay gabayadiisu ku caan yihiin waano, wacdi, tusaalayn iyo nacayb xoog ah marka ay noqoto qabyaalad ku dhaqanka. waxaad mooda in aragti gaar uu u lahaa sida qabiil ku dhaqanku uu ahaa dhaawaca, baabi'nta, dumista kala fogaynta dadka ku nool cara edeg dhammaantood.
Gabygan magaciisa waxa la yidhaa Murugo waana sarbeeb ila hadana safayntiisu ay ku maqantahay dadka aqoonta u leh gabayada.


Wuxuu yidhi timacadde ilaahay ha u naxariisto eh:

macnuu gabaygu kala leeyahayiyo jar iyo miidaane
layskuma marduufee haddaan miimka ka higaadsho
masalooyinkaygii haddaan maayada u laliyo

haddaan maago maantaba inaan mariyo luqdeeda
u meermeeri maayo'e tixaan meel dhow ku ogaaye
miyirsada anaa tu'aan yarayn idinku maanshayne

moqor ma laha geeduba hadday mayayga weydaaye
maalkuba caleen kama heleen milcda dayreede
midhuu kama bislaadeen haddaan gu'gu masruufayne

anna waxaan maleeyaan sidii milicda muujaaye
miyirsada anaa tu'aan yarayn idinku maanshayne

miidaan la soo xidhay shirkuu rag isku maan dhaafo
isagoo muxtaaj loo yahay baan muunadayn jiraye
markaasaan muquuno u baxshaa araar leh miisaane

midh la yeedhku goortuu bartaan kaygi meel dhigaye
miyirsda anaa tu'aan yarayn idinku maanshayne

afartaa wax layskuma maro'e miim ma ka higaadshay
maxlal hadalka waa u odhan jiree ma u masalo sheegtay
malyandheerka aaraartuu ahaa macalinkaygiiye

mudanii AFLOW iyo sidii MUXUMAD maw yeedhshay
micne kalana waa hadaladay muhatay laabtaydu

sida maxamadow mugul kaliil maangad lagu ooday
oo mayay gu'oo iyo maax biyo leh weyday
oo waa mawaashi saqdhexe maa ka tidhi beesha
madoobaadayeey xalay miyay murugtay laabtaydu

sida mayl ka soo baxay Hindiya marinadii Jaawa
uu macalinkii waday xukumay mood in laga buuxsho
oo maalmo badan soo dhaxoo meel marso leh gaadhin

uu minawaarka quusaa u dhigay maynka lagu goosmo
oo wixii makhluuqaad ku jiray maalku kala soormay
madoobaadayeey xalay miyay murugtay laabtaydu

sida naag ninkeedii mudna mawdku kala qaaday
oo macangag liittaa u hadhay yeeshay meherkeeda
oo inay ka meemeeriyaan magane doonaysa
madoobaadayeey xalay miyay murugtay laabtaydu

sida carab macdar wacan dhigtoo mihindisoonaaya
oo maqayil xaafaddo u tagay lagama maarmaan ah
uu tuug musbaarrada guray uu taabay maqalkiisa

oo aan maliim lagaga tagin mulug wuxuu haystay
aan madhax raasamaal meel ka dayanaynin
madoobaadayeey xalay miyay murugtay laabataydu

sida maahir geeloo diraac madax sare u booday
oo gubad magoolliyo tigaad mruqle soo daaqday
haddii aan madoobow ratiga heeryo lagu miisin

milmil iyo haddaan loo carrayn marin xadhaadhoobay
madiix ololku wa gar'e hadday miridhna daynweydo
uu kala melmelo jeelku waa meheradiisiiye
ninkii maali jiray waa xaqiiq inay masoobaane
madoobaadayeey xalay miyay murugtay labtaydu

sida inna'n mabsuudoo rug wacan maalig ka abuuray
oo oday masaa'ibi dhalloo laga mildhaabaayay
makri ma laha naago'e hadday mahadda hayn weyday

oo inay hablaa wada maraan milicda doonaysa
uu innan ku meeraysan jiray meel fog ka ilaaqday
uu habar macluuna u diray ooy moqotinka u saartay

oo aan ka maanicin wuxuu uga muraad yeeshay
oo lay muwaafaqay halkuu maya ka dhawraayay
oo farakh makankeeda galay madax wareeraysa
madoobaadayeey xalay miyay murugtay laabtaydu

hadduu muruqa bawdadu ku go'o waad makalantaaye
ninkii midigta laga taabayow bidixdu waa maafe
markaha daarka waxa loogu tolay meel ha joogsado'e

waxa maraqa loo seesayaa maahir yay jaqine
miiraalaha hortiibaa guryaha layska moosaaye
mareegtaaba loo sii guntaa maqasha nayloode

yaanan hadalka muurmuurinine waxaan ku maydhaamay
macnaha iyo ujeedada ninkii maaxiyaa garane
Reer Saxardiid   Dib U laabo Reer Saxardiid   Dib U laabo Reer Saxardiid   Dib U laabo Dib U laabo Soo bandhige: Fu,aad Sh. (Bahda Mareegta Farshaxan)
Xigasho: Mareegta Hoyga Suugaanta
Copyright ©2003- Mareegta Raadraac ee Farshaxan. All Rights Reserved.